طاہر القادری آج رات برطانیہ روانہ,ماڈل ٹائون کیس یورپی یونین میں اٹھانے کا فیصلہ

قائد عوامی تحریک طاہر القادری آج رات برطانیہ روانہ ہوں گے ، سانحے کی اہم سی ڈیز اور شواہد لندن پہنچا دیئے گئےلاہور سٹی پریس( سٹی رپورٹر )
عوامی تحریک نے سانحہ ماڈل ٹاون کیس یورپی یونین میں اٹھانے کا اعلان کردیا ۔ ڈاکٹر طاہرالقادری نے لندن میں سینئروکلاء کااجلاس طلب کرلیا۔ آج رات برطانیہ روانہ ہوجائیں گے ۔ عوامی تحریک کے قائد ڈاکٹر طاہرالقادری آج رات تین بجے ایمریٹس ایئر لائن سے برطانیہ روانہ ہوں گے ۔ عوامی تحریک کے مطابق ڈاکٹر طاہرالقادری نے سانحہ ماڈل ٹائون کا معاملہ یورپی یونین انسانی حقوق کمیشن میں اٹھانے کا فیصلہ کیا ہے ۔ سانحہ ماڈل ٹائون اہم شواہد ، سی ڈیز ، دستاویزات لندن پہنچا دی گئی ہیں ۔ جمعرات کے روز لندن میں ڈاکٹر طاہر القادری سینئر وکلاء کے سا تھ کیس پر مشاورت کریں گے ۔ وکلاء کی مشاورت سے ڈاکٹر طاہرالقادری خود بھی انسانی حقوق کمیشن میں پیش ہوسکتے ہیں ۔ عوامی تحریک نے یورپی یونین میں کیس اٹھانے کی تصدیق کردی ہے ۔ ابتدائی پٹیشن کا مسودہ تیار کرلیا گیا ہے ۔ عوامی تحریک کی قیادت کے مطابق سانحہ ماڈل ٹائون میں انسانی حقوق کی خلاف ورزی پر انصاف نہ ملنے پر معاملہ یورپی یونین میں اٹھانے پر مجبور ہیں ۔ وکلاء کی مشاورت سے اگلے لائحہ عمل کا لندن میں فیصلہ کیا جائے گا ۔ ڈاکٹر طاہر القادری لندن میں پریس کانفرنس سے بھی خطاب کریں گے ۔