ہندوستان پاکستان کو عالمی سطح پر تنہا کرنے میں کامیاب ہوگیا, مودی کا دعویٰ

کیرالا: ہندوستانی وزیر اعظم نریندر مودی نے دعویٰ کیا ہے کہ ہندوستان، پاکستان کو عالمی سطح پر تنہا کرنے میں کامیاب ہوگیا۔

انڈین ایکسپریس کی رپورٹ کے مطابق ہندوستانی ریاست کیرالا کے ساحلی شہر کوزیکوڈ میں انتخابی جلسے سے خطاب کے دوران نریندر مودی نے پاکستان پر الزام عائد کرتے ہوئے کہا کہ ’ایک طرف ہندوستان سوفٹ ویئر برآمد کر رہا ہے، تو دوسری جانب پاکستان دہشت گردی کو فروغ دے رہا ہے۔‘

انہوں نے کہا کہ ’اُڑی میں دہشت گردوں نے 18 ہندوستانی فوجیوں کو ہلاک کیا لیکن میں انہیں بتانا چاہتا ہوں کہ ہندوستان اس حملے کو کبھی نہیں بھولے گا، حملے کے بعد پورے ملک میں غصے کی لہر پائی جاتی ہے جبکہ یہ حملہ تب ہوا جب ہمارے پڑوسی ملک نے کشمیر میں دہشت گردی کو فروغ دیا، لیکن ایک دن آئے گا جب پاکستانی عوام خود دہشت گردی کے خلاف جنگ کے لیے اپنی ہی حکومت کے خلاف ہوجائیں گے۔‘

نریندر مودی کا کہنا تھا کہ ’گزشتہ چند ماہ کے دوران ہندوستانی فورسز، کشمیر میں 110 سے زائد ’دراندازوں‘ کو ہلاک کرچکی ہے اور میں پاکستانی عوام کو بتانا چاہتا ہوں کہ ہندوستان آپ سے لڑائی کے لیے تیار ہے، اگر آپ میں ہمت ہے تو آگے بڑھیں اور ہندوستان کے ساتھ غربت، بیروزگاری اور ناخواندگی کے خاتمے کی جنگ کریں، پھر دیکھتے ہیں کون اس میں سرخرو ہوتا ہے۔‘

انہوں نے دعویٰ کیا کہ ’ہندوستان پاکستان کو عالمی سطح پر تنہا کرنے میں کامیاب ہوگیا ہے اور اپنی اس مہم میں مزید تیزی لائے گا تاکہ پاکستان مکمل طور پر تنہا ہوجائے۔‘